生活記錄：2025前夕，迎接節日嘅香港人

好快，到咗我2024年最後一日返工。

如果話有咩特別深刻嘅事，大概係中午食飯之前manager行過嚟問我嚟緊假期會去邊度旅行，同埋喺最後收工分別之前，坐開我哋嗰一排嘅同事嘅深深擁抱。大家揮揮手，講一句下年再見，然後一個個離開公司，有種釋放感，但又好收斂。

雖然聖誕仲未到、但中環周圍早已放滿聖誕樹，置地建築群嘅行人天橋亦都掛滿彩燈。行人匆匆，只有零星幾個遊人停下影相。

可能好多喺度返工嘅人都係喺呢幾日完咗今年嘅返工任務，每日嘅德輔道巴士站都企滿表情放鬆嘅人，大家傾嘅話題唔同咗。好唔同，唔單只係話題唔同、連表情都睇得出唔同。有一種好似有啲淡然嘅表情，係恆指跌破一萬點都與我無關嘅淡然。

而家中環企滿拎住手提包放工嘅打工仔，可能係今晚，可能係聽日，機場或者各個關口又會企滿拎住行李嘅出遊人群。大家會喺呢個小小香港，一次過散晒落全世界。戰績：廣東話佔領地球。

放假，就係香港人逃離香港嘅遊戲，彷彿香港只係一個喺工作日返工、賺錢、進行生存競爭遊戲嘅角鬥場，過咗工作日大家就要離開呢個遊戲去第二個國家打卡旅行，去扮下自己有好好休息。

即使撳開IG就可以見到香港各地聖誕同新年裝飾嘅廣告，大家嘅Google都依然係「日本 聖誕/新年旅遊攻略」、「首爾 聖誕/新年旅遊攻略」，同時又會一邊喺網上集體懷念細時尖東海傍嘅節日氣氛。

其實唔知由幾時開始，香港人對現實香港嘅印象變成「而家嘅香港已經冇咩值得留戀」，值得留戀嘅係過去以及而家嘅其他地方。一邊對習慣咗嘅風景大加貶低，一邊無限抬高其他人習慣咗嘅風景。大概係因為呢啲習慣咗風景對香港人嚟講早已變成重壓社會嘅具象寫照，呢啲熟悉又變化嘅地方代表著集體創傷、因此好多人不願意再去暸解。

而無論另一個社會對另一個社會嘅人帶來幾大嘅負面，喺香港嘅大家都依然會以新嘅、「他者」嘅視角去發現、參與、然後以香港人嘅諗法去建構對呢啲地方嘅想像。再用這些想像去療癒自己喺香港獲得嘅痛苦，去繼續下一個循環。唔係所有人係咁樣、但係至少我周圍已經好多人係咁樣。所以不斷工作、然後旅行（或者完全蜇居屋企沉醉於虛擬世界以作另一種方式嘅「逃離」）、由「逃離」中汲取下一次工作嘅能量、之後繼續喺荒亂嘅生活同工作中耗盡。

好似2024年咁，其實2025年又係好快就嚟到。只能希望我同大家都會喺呢新嘅一年搵到真正嘅逃離出口吧。