生活短記：2025！維港跨年

事隔三年，我終於又一次同摯友們喺香港倒數跨年。諗返上一次跨年好似已經係好多好多年前，耐到記唔返。

如果問我對今年香港跨年嘅氛圍有咩評價，我會講：好耐冇似今次咁有種「活著」嘅感覺了。

其實前幾年跨年都係喺香港。不過自認對人群過敏嘅我，又真係好少會有想行出去一早霸定位、返嚟又要一路迫嘅諗法。得個懶字，所以以前嘅跨年無非IG同朋友話新年快樂，然後繼續撳電話到瞓覺。

今次好突然，突然到去到嗰日先同frd定咗放工後去西九龍，到夜晚7點先開始決定就咁近喺佐敦食咗食薩利亞，到西九龍先開始物色企/坐邊啲位。

就係咁隨意，無人睇過西九龍跨年懶人包，無人諗過萬一會坐草地要帶啲嘢擺地下，甚至連我哋揀定嘅位置都係因為有個朋友想上廁所我哋陪佢搵完先見到有咁個草地。所以當我哋八點幾九點到最前嗰個草地嗰陣，我哋係乜都冇準備，只能係咁坐喺有啲濕嘅草地上。

嗰晚都真係好多人，好多香港人。我見到有成班應該係同學嘅學生，有應該係同事嘅年青人，同咪都有唔少家庭檔。大家舖咗露營袋坐喺地面上、瞓喺露營袋上傾偈，傾足成晚。

無論過去呢一年過得如何，有多少折磨，至少呢一刻大家嘅表情係放鬆嘅。係嗰種好難喺香港人面上見到嘅暢快表情。

真正去到倒數嗰一刻嘅時候，你會見到所有人起返身，隨時間高呼「三、二、一」，再隨著煙花升空深吸口氣，炸出嗰句真誠嘅「Happy New Year」。低氣壓沖散，短暫晴空浮現。

睇住綻放嘅煙花，我心中莫名響起「Auld Lang Syne」旋律。時間好似凝固落嚟咁，舊時光喺煙花聲陣陣中遠去，所有嘢都慢慢離大家而去，呢一刻只有永恆嘅煙花同青春。

事實上無論最後煙花效果係如何，煙花本身始終都只係一種催化劑。最重要係大家過足呢一年，真係會需要一個契機、一個途徑令到可以釋放喺呢一年累積嘅低氣壓，再喺度叉電去令到自己可以再有返少少勇氣同希望繼續前行。

咁多人聚埋一齊淨係去慶祝一件事好青春，好鼓舞。但係要好似煙花咁大聲去釋放、今次可能已經係好多香港人今年嘅第一次同埋最後一次了。當夜空再次回復寧靜嗰陣，大家都係要起身離席，去返自己嘅小小世界做一個按部就班嘅人。

香港嘅生活當然冇可能每日都好似跨年咁華麗，就係因為平時嘅生活有各種痛苦、各種按部就班，先會令到呢一刻嘅短暫快樂顯得更加珍貴。

無論呢一年經歷過幾多事，至少喺新年呢個時刻，所有人都值得一場盛大嘅跨年煙火同由衷嘅一句「新年快樂」。