書香 - 明室：攝影札記 La chambre claire - 羅蘭巴特 Roland Barthes

羅蘭巴特喺1979年最後完成嘅著作，一部關於攝影為何事嘅文字作品，全書分咗兩部份，第一部份去闡述攝影，第二部份套用自己嘅經歷。筆者估計作者失去母親後，尋找母親相關相片時去反思相片或者攝影同人類存在現實所有嘅關連而寫出哩部作品來。

佢講攝影並唔係一個容易理解嘅題目，尤其是佢第一部講嘅關於操作者、被攝者、觀看者中間嘅關係，一張相片裏關於「知面」同埋「刺點」嘅關係，一般我哋睇到嘅係相片普遍上嘅資訊，但係嗰張相片入邊有冇觸動你嘅刺點呢？

第一部用一種好哲學性嘅方法剖析，去到第二部你或者會明白點解佢會有呢一份剖析，就係當佢喺睇逝去嘅母親舊照片時對佢思想嘅觸動。觸動佢嘅唔係一啲見過母親模樣嘅照片，而係一張佢母親小時候嘅照片，應該話佢出生以來就冇見過嗰個樣嘅母親嘅模樣嘅一張照片。

咁點解一張咁嘅照片反而係觸動到佢呢？呢個就係羅蘭巴特點解會寫哩48篇散文關於攝影嘅原因。

再翻查其他文獻，原來佢哩部最後作品都引發咗唔少嘅迴響，有人覺得佢對攝影嘅闡釋個人化而唔似係一種論述，有人會覺得同佢一向主張嘅論述方式有所不同。

筆者在看哩本作品時並沒有看過羅蘭巴特其他著作，純粹因為攝影一事想了解一下哩位學者如何看，所以不存在任何批判，反而佩服羅蘭巴特對於攝影哩個又客觀、又主觀嘅藝術手法剖析得都幾透徹，再者，佢寫哩部作品時也經歷喪母之痛，這也令我更加身同感受 。

______________________

這是Roland Barthes羅蘭巴特先生的《La chambre claire 明室：攝影札記》。