無獨有偶，無毒卻有嘔

Sir Jaydon 呀，佢以為自己係？

三份貴價糧溝一份食開嘅，佢發現嗰啖裡面有食開嘅舊糧，就好小心又好隆重到我以為佢含住隻大倉陶園吳須赤繪骨瓷碟咁，原啖從口中慢慢放落地，兼夾分開一啖一個位，慌死會整親啲糧咁。有時候食得太快，趁未消化，重會原粒嘔返出嚟控訴你。

佢冇理由知道我因為食魚唔識吮骨，食到有細骨就原啖𦧲都𦧲唔切咁𦧲落枱面呢啲咁嘢喎。喂，basic gagging instinct 呀，我都唔想咁折墮又醜怪，所以喺出面盡量唔食魚，廢事畀人誤會我格調太高只挑貴魚嘅 fillet 嚟食。

物似主人形，堅係。唔係咁講我都唔知點幫你兜你兜飯好。

又有啲唔似嘅。我唔會𦧲完之後重想指控我落毒害佢咁斜啤我。

你個冚家富貴你陰鳩我.jpg 

又同埋我唔會嘔完之後只要有人坐佢枱陪食飲返兩杯摸下個頭就乖乖地逐粒食返晒。其實呢隻冇骨氣，同我家陣嘅骨質疏鬆……都算係 friend 嚟嘅。

今日又係咁。終於，我抵唔住頸，問佢：

「到底你想點呀？」
「我咁樣問，唔算過分吖。」

（節錄自何嘉麗90年代神曲《無可奉告》當中，鄭丹瑞屈機的深情對白）

然後佢只係打平咗對垂直嘅耳仔，默默地繼續食飯。佢冇答過我，甚至極力逃避我眼神。我都冇再問佢。喺食呢兜飯嘅十幾分鐘，我地個世界變得好靜好靜，靜到只有個嘴撩飯聲、咀嚼聲、我兩個屁嘅聲。

無回音，好實在。