煮飯仔、睇中醫、職場文化差異衝擊到差點倒地不起@2月

月過得好慢，慢到好想快啲過完。今個月好多離奇事情發生，又令我久違半年想返香港搵工。認真，加加埋埋讀書打工我係台灣工作都算累積四至五年，仲係唔太適應台灣工作文化。

工作上的文化差異

同香港唔一樣，係香港成日燥底，覺得啲嘢明明可以做好啲，但大家唔做，只係hea度假做陪笑。個個都只係想快啲撈一筆，割禾青。只要老細開心就OK，最緊要一齊柒，無論組織幾咁腐敗都依然繼續。人人都呃住自己，我好快樂，我好熱愛工作。不過，香港喎，唔應該係咁，係咪？

台灣呢邊係，人人都好勤力，好聽話，但啲野無辦法做得好啲。最唔適應係台灣人做嘢唔溝通，你講佢唔想聽，你問佢答得好簡單。佢唔係無答你，而係佢覺得俾十分之一資訊就OK，其他你讀空氣啦。所以一件事你問足佢10分鐘，有啲細節都仲係交待唔清楚，出咗事佢又話你︰「做乜唔問清楚啲。」所以成日都聽到啲同事問嘢問到好似鬧交咁。

呢個文化好主要原因出自於「模糊是上佳機會」。好處係，台灣人會俾機會你試，我以前係台資書店做咗好多奇怪嘢，換轉香港書店，未做之前已經diu咗。台灣主管會望一望你，猶豫一陣，然後話︰「那你觀察這星期的變化，如果書沒有動就變回來。」

唔好既係，工作上成Q日要估，要摸底。得就得唔得唔得，佢地唔係既，唔出事就OK，出事再算。最近朋友工作診所發生咗一單人命尤關既意外，俾政府罰錢。聚集咗幾十個資深員工以及律師顧問去研究，到底呢個後果係咩原因導致？按照白紙黑字，公司應該係犯咗十幾條法例，最尾只罰一條。研究結果係，雖然政府話ABCDEFG都唔得，估唔到居然係，A唔得，B唔得，A+B係得，B+C都得。公司個case係A+B+C+D+D+F，所以剩係罰G。

團友的交通事故

呢壇野又令我唸起有人帶團，團友分享上個月揸車經過新光三越(最近台中氣爆個條路，澳門旅客出意外，R.I.P.)。新光個條路經常塞車，有個阿伯從右邊機車道，想cut出左線。塞緊車嘛，團友無郁，車係停既。點知個阿伯技術精湛，用機車前碌，撞到汽車左後碌，跌低咗，自己報警。好似係擦傷定唔知點，好輕微。呢啲擦撞係香港一定係後車責任，結果警察判雙方都有責任，汽車要賠錢俾機車，機車又要罰亂cut線。好采團友話保險賠咗。

BTW傾咗陣團友教我買散股……跳得好勁。

不過我唸令我最想返HK搵工其中一個原因係，香港勞工保障其實唔錯。台灣勞基法離開咗台北只係參考文件。香港至少目前嚟講勞工處依然有效執行。同埋，有啲重大決定同調動，公司起馬會通知聲，台灣係突然下旨，唔話你知。

我之前就試過有件小事，問上頭HR，HR話我做交齊曬資料就會幫我申請。後尾交齊曬，再問，佢話，你等陣。一個月後再問，佢突然話︰「乜你依家可以獨立作業啦咩？你用住其他人既資料先。」結果我等咗4個月，先至俾我。好采無人篤灰，如果唔係……所以返工成日都處於好不安既狀態，呢種狀態唔係我喜歡的。

當然繼續都仲係要唸錢既問題，係台灣，錢真係一個好難解決既難題。咁都無既，唯有希望身體暫時唔好出事。因為依家真係無財力去解決個問題。

落山風藝術節

因為一月份總算收入足夠，三次尾牙+兩次人像，兩年嚟第一次真正夠數。1月尾2月份就奢侈咗少少，出門比較多。年初一去咗旗山，以往我既習慣係新曆年、農曆年初一登高。旗山唔係山，有個山字，都算啦。

2月第一個星期去咗轉落山風藝術節，係屏東一個小小港口，同事強烈推薦。本來我約咗幾個網友租車去，臨時網友感冒取消，我就自己去。可能仲好，因為我未試過副駕無人情況下係台灣揸車。

呢次行程唔太順利，搭火車到枋竂，預計10:30開出接駁巴士無嚟到。我O曬嘴，明明出發前一天問過，hotline話班次OK，枋寮站旅客服務中心亦都話有車︰「有車呀！為甚麼還沒到。」

現場都有十幾個人等緊，其中一個大哥打電話去hotline，睇得出電話對面遲疑咗幾秒︰「今日雖然係星期六，但今天算平日的時刻表喔，下一班11:55才開。」咁搞法所有行程都要改，正當我同一個阿姨傾緊計，一齊度行程既時候，接駁車就嚟咗，10:45分。車當然就無開啦，照樣11:55，但當下俾我哋既感覺係，司機唔記得時間開車，咪唯有將錯就將囉。呢啲都算台灣日常。

當日天氣奇差，風大到行唔到直線，捲起沙子吹襲，中途仲落雨，全日都見唔到陽光。好啦，影咗兩個幾鐘無嘢影，準備上車走人，臨走最後十分鐘，出太陽。

吹足幾粒鐘既我，第二日就病病哋。

煮飯仔

趁住農曆年購物網減價，買咗個日本煮飯神器，號稱一部機一條友搞掂飯+餸。

購買過程有少少唔愉快，10分裡面4分。落單前客服秒回。落單後，物流出問題。應該到7–11既貨無去到，7–11物流、平台物流、賣家統一全部唔覆。搵極都無人。

過咗幾日，我訂博客來到貨，7–11職員話，你有兩件喎。莫明奇妙就到咗。等我用咗七日，過埋試用期，夾夾埋埋12日，賣家就覆message啦︰「你聯繫當日我們休假喔。」吓？

算數。台灣日常ag，唔溝通，唔通知，講聲好閒啫，洗死咩。BTW因為兩年幾無自己煮飯，2月份好開心每日放工都煮飯仔。個煮飯神器，勉強可用。飯煮得熟，餸煮唔熟。佢標榜一件嘢可以一次過飯加餸十五分鐘煮好，實測結果應該只能加熱原本熟咗既餸。新近實測係，要兩樣都熟，至少要用40–45度暖水煮飯。

連洗連煮夾夾埋埋都要一個鐘，即使每日少咗一個鐘砌模型，主婦手發作，都開心既。希望咁樣可以改善胃食道液流問題。我本身腸胃唔係太好，由細到大睇醫生，醫生都係話︰「係咁架啦，你先天脾胃弱。」小學時醫生已經話我無得救，食齋都無用。自己煮飯個期腸胃就好啲，唔煮就差啲。

睇中醫

2月份都開始去睇中醫，調理下腸胃。朋友推薦既馬光中醫，咁多年嚟第二次睇醫生，個醫生係起馬願意去望一望我，同埋無diu 9我。我以前係香港都有睇開既中醫，朋友介紹，人人都睇。但每次去，佢都寬佬懶理。我唔係唔舒服到無辦法，都唔想睇佢。

之不過我啲朋友對佢讚不絕口，我有時會覺得可能係我樣衰，無計。而結果係我離開前，同朋友傾計，傾開，佢先抱怨話，中醫叫佢去做心電圖︰「我睇咗佢五年，佢依家先講。」

依家睇呢間都連鎖，好爺介紹。服務酒店級，醫生都好有禮貌，出奇地有禮貌。呢位醫生問得比較多，比較仔細。看診同把脈就OK，但至少唔會令我唔想去覆診。同埋明顯溝通技巧有訓練過，睇到啲《跟任何人都聊得來》、《哈佛教你打造溝通力》、《跟華爾街之狼學銷售》類似溝通技巧。

舉個例，佢問起一件事，我照講，佢會話︰「哦你之前有提過……」呃……我根本無。雖然係咁，但俾人既感覺係佢至少肯聽，而唔係拿拿林開藥，開完你走啦。咁樣。

2025計劃始動

舊年變化非常大，有啲想做既事無做到。2025開始計劃。首先係報返個外語領隊牌，考完可以帶外國團，咁就，其實我有HK牌，去外國我會比較想帶香港團。當然都只係幻想，香港無乜人脈，之前有間台北旅行社話想搞HK船P，HK租船一日仲平過台南租，搞掂搵我帶團。幫佢搵曬報價，設計好行程，之後就無咗下聞。呢兩年遇親搵我帶既團，唔知點解都係以下情況︰

出發前十日，客︰「唔好意思，我哋搵咗第二個導遊做司導。」

哦，唔緊要。有咩想知隨時問我。

出發當日，客︰「想問下你今日仲有無時間呀？我哋到咗機場但本身預約咗既司導無嚟到。」

另外，正式向高雄在地導遊出發，搵咗啲政府單位報名訓練。台中就無呢種嘢，高雄既文化局係每個古蹟假日都會安排導賞人員。我都幾想試試。

治標又治本既方法

距離移民潮到今日三、四年，唔知係人老咗定咩，呢幾年過得特別快。好多朋友經已坐完移民監，計劃返香港搵錢，或者返大灣區搵希望。

社會普遍覺得離散係好感傷既事情，我自己唔係咁睇，人類本來就流動，好多繁榮既城巿，本身都係移民社會。美國本身都係一個移民國家，係咪先。每個人際遇唔同，我都有朋友係加國十分順利，亦都有屢屢遭遇唔開心既人。

同樣去旅行，有啲人開開心心，有啲人拐咗去KK園。

返咗嚟台灣兩年幾，係由舊年暑假落咗高雄，生活先叫做慢慢好轉。雖然距離收支平衡仲有好長一段距離(收入只有之前四分之一)，總體而言我覺得會想留係呢個城巿三至四年。我要既係機會，營造屬於自己生活既機會。

最近亦都開始買啲帶唔走既日常用品，例如個煮飯神器。睇到白兵推薦Bita濾水壺，家樂福同momo都有折，心思思想落手。自從2022年初計劃逃走至今，2月係第一次想買一啲帶唔走既嘢既月份。

台灣同事亦都每隔兩至三個禮拜問我，打算係台灣留幾耐。我笑笑口，我鐘意台灣呀，你唔炒我，我咪繼續留低囉。勞基法規定，無論佢郁我定我郁佢，都只係10日。如果佢真係郁我，咁我都唯有返去。係香港搵工大約一至兩個月會搵到，台灣呢，大約要半年左右啦，會餓死。

話又說回來，我都係唔鐘意香港先走既啫，未有揸拿之際又打回頭，可能解決到一時問題，並唔係長遠之計。但到底呢個時代有啲乜嘢係長遠既呢？問心，我都唔知。

每周一則城巿故事。突破點對點生活模式。
邁開腳步，劃出舒適的平面。喜歡原地遊的內容，請接續以下方關注更多動向：【 Facebook｜Instagram｜Patreon｜Gunroad｜Pinkoi｜500PX】